ƏS-SƏMİİ'

Ya Səmi! Yarına hər şey bəlli olan birinə yarın danışmağa nə ehtiyac var?! Fəryadım eşidilir açıq-aşkar, dilə gətirməyə nə ehtiyac var?! Dil avara, dodaq biçarə, paralanmağa nə ehtiyac var?

ƏL-BASİR

Ya Basir! Korluğuma koram, gördüyümə belə koram, göstərdiklərinə belə koram, vəd etdiyin cənnətinə belə koram. Sənin görmənlə görər bütün gözlər, aç gözlərimi!

ƏL-HAKƏM

Ya Hakəm! Sən, varlıq ağacını köklərindən çıxarıb, qaranlıqdan vücuda gətirənsən. Sən bu qəlbimi bir nütfə kimi rəhmətinin rəhmində bəsləyib böyüdənsən, qəlbimə dəyən sızıntıları incə-incə söz eylə, yanaqlarıma dəyən göz yaşlarımı damla-damla rəhmət eylə, dodağıma dəyən hecələri dəstə-dəstə dua eylə!

ƏL-HAFİZ

Ya Hafiz! Elə Hafizsənki, yoxluğa yuvarlarsan varlığı ilə qürura düşəni. Elə Hafizsənki, zillətə düşürərsən özünü ucaldanı. Qürurdan azad et nəfsimi, zillətə düşürmə məni!

ƏR-RAFİ

Ya Rafi! Ya Rafi! Səcdələrimlə sultan et məni, qulluğumla şərəfləndir məni, qatında rütbələndir məni, yaxşılar arasında xatırla məni, yüksəklərə al məni!

ƏL-MUİZZ

Ya Muizz! İzzətim varsa yalnız Sənin verdiyin qədərdir. Yalnız Sənə itaət etmənin izzətini ver mənə, izzətinə nail et məni!

ƏL-MUZİLL

Ya Muzill! Sənə boyun əyməm, ən böyük sevincimdir! Sənin qapına gəlməyən sonsuz çarəsizliklər içindədir. Sənə möhtac olmam ən böyük şərəfimdir, cavabsız buraxma məni!

ƏL-FƏTTAH

Ya Fəttah! ! Damla qədər də olsa savabıma görə lütf et və Cənnətinin qapılarını aç üzümə! Yolumu azsam da Kərim olaraq Sənə gələn yolları aç üzümə!

ƏL-ALİM

Ya Alim! Sənin üçün bilmənin və elmin başlanğıcı yoxdur, mən isə ancaq sonradan bilərəm. Sənin bilmədiyin bir an yoxdur, mən isə bəzən bilərəm. Sən açıb söylədiklərimi də bilirsən, içimdə gizlədib demədiklərimi də bilirsən, unudub özümdən gizlətdiklərimi də bilirsən. Öz quyularıma ağlımın iplərini sallaram, amma özümə ağıl verməz. Sən məni məndən çox tanıyırsan. Qəlbimin quyularında dolaşıram, özüm özümə yetmirəm. Sən mənə məndən çox sirdaşsan. Bildiyimi bilənlərdən et məni, bilmədiyimi bilənlərdən et məni! Sənə məlum olan ayıb və qüsurlarımla utandırma məni!

ƏL-QABID, ƏL-BASİT

Ya Qabid, Ya Basit! Genişlik verərkən şükr etməyən kimsəni, dara salarsan. Dara düşəndə də şükr edən kimsəyə genişlik verərsən, təqdir Sənindir! Ya Rəbbi, Sənki imkansız olan şeyi mümkün edərsən, darda qoyma məni, dara düşdüyümdə belə şükr edənlərdən et məni!

ƏL-ĞAFFAR

Ya Ğaffar! Gizli peşmanlıqlarımı bilən Sənsən, göz yaşlarıma dəyər verən Sənsən, amma bilirəmki rəhmət dənizlərini bulandıra bilməz günahlarım. Rəhmətinlə bağışla məni.

ƏL-QAHHAR

Ya Qahhar! Sən elə Qahharsanki, qəhrində lütfün çox, qəhrində tələsmirsən. Sən elə Qahharsanki, qəhrində ədalət var. Düşmənimiz çoxdur, acizliyimiz də sonsuzdur. Qəhrinlə həlak et zalimləri!

ƏL-VAHHAB

Ya Vahhab! Yoxluğa sırf yox olduğu üçün varlıq bəxş etmisən. Nankorların belə, ruzisini kəsməzsən. İnkar edənlərə belə, nəfəs verərsən. Varlığım Sənin lütfündür, Sənin ehsanındır. Aciz varlığıma lütfünü, ehsanını daim et!

ƏL-RƏZZAQ

Ya Rəzzaq! Xəzinəndə yox deyilən şey yoxdur. Ol deyərsən, hər şey olar. Yaratdığın hər canlının ruzisi sənin qatında saxlıdır. Vəhyin mömin qəlblərin, səlim ağılların ruzisidir. Ya Rəbbi, sənə möhtac olmaq ən böyük zənginliyimdir, Sənin fəqirin et məni! Sənin verdiyinlə doymaq ən böyük ləzzətdir, süfrəndən ayırma məni!

ƏL-MÜTƏKƏBBİR

Ya Mütəkəbbir! Mən acizəm, Sən isə Qadirsən. Mən fəqirəm, Sən Rəhimsən. Mən ölüyəm, Sən həmişə yaşayırsan. Mən çarəsizəm, Sən Əhədsən. Mən möhtacam, Sən ehtiyacsızsan. Mən karam, eşidən Sənsən. Mən koram, görən Sənsən. Mən dilsizəm, danışan Sənsən. Mən yaradılmışam, Yaradan Sənsən. Mən yoxam, var edən Sənsən. Mən heçəm, amma əməllərim böyükdür. Mən yoxsulam, amma istəklərim çoxdur. Mən istərəm, çünki Sən böyüksən, şahid yaz böyüklüyünə bu kiçik qəlbimi.

ƏL-XALİQ

Ya Xaliq! Sən ol deyərkən, hər şey olur, ol deki, olum, yaratdıqlarının arasında qalım. Haqqıyla əxlaqlı olum. Sən yaratdın deyə gözəl olum və həmişə belə gözəl qalım.

ƏL-BARİ

Ya Bari! Ruhum Sənin əlindədir, bədənim sənə əmanətdir, yoxluqda tərk etmə məni, qaranlıqda buraxma məni, çirkinliyə daldırma məni, gözəl et hər halımı!

ƏL-MUSƏVVİR

Ya Musəvvir! Yoxluğa varlıq surətini geydirən Sənsən. Heçliyə varlıq boyasını cəkən Sənsən. Gözəli gözəl edən ancaq sənin təsvirindir. Sən mənim sifətimi mənim üçün tək, sevdiklərim üçün tanınmış etmisən. Qatında məqbul olan gözəlliklə təsvir et surətimi!

ƏL-MUHƏYMİN

Ya Muhəymin! Sənsən qəriblərin sığınacağı, Sənsən kimsəsizlərin dayağı, Sənsən haqqı himayə edən, Sənsən ağlımı aldanışlardan və yalandan qoruyan, Sənsən ayağımı hiylələrdən və tələlərdən qoruyan. Sənki zəifləri qüvvətlilərin şərrindən himayə edərsən, məzlumların haqqını zalimlərdən almağı vəd edərsən. Sənki mənim ən kiçik, ən əhəmiyyətsiz, ən gizli arzularımı da bilir və mənə mərhəmət edirsən. Nəfsimin yalanlarına aldanmaqdan qoru məni. Aşağılara və alçaqlığa yuvarlanmaqdan qoru məni.

ƏL-ƏZİZ

Ya Əziz! İzzət Sənindir və Səndəndir İzzət. Sən istəsən kimsə zillətə düşməz, Sən verməsən heç kimdə izzət qalmaz. Qəlbim yalnız Sənə yönəlir, yaxınlığınla əziz et qəlbimi. Ruhum yalnız səni axtarır, hüzurunla əziz et ruhumu! Mənim halım və vəziyyətim yalnız sənə aşkardır, başqalarının yanında rəzil etmə məni!

ƏL-CABBAR

Ya Cabbar! Sənki məğrurları qürurlarına əsir edərsən, Sənki təkəbbürlük göstərənlərin boynuna təkəbbürlüklərini bir yük edərsən. Sən, zorluq edib zülm edənləri, öz vicdanlarının pəncəsinə həbs edərsən, bir milçəyin vasitəsilə Nəmrudlardan qurtar məni! Bir vasitəçi göndər, fironlardan qurtar məni! Əbabilləri göndər, məni Əbrəhaların fillərindən qurtar! Nəfsimin məni zorlamasına izin vermə! Ağlımın məni azdırmasın keçid vermə! Həmişə itaətçi olaraq sabit saxla məni!

ƏL-MƏLİK

Ya Məlik! Kimsənin kimsəyə fayda verə bilməyəcəyi gün hökm Sənindir! Göylərin yarıldığı gün sahibim Sənsən, ulduzlar dağılan günü sahibim Sənsən! Varlığım mənə aid deyil, varım yoxum hamısı Sənindir, əlimdə olanlar mənim deyil, sahib olduqlarım da Sənindir, yoxluğa düşürmə məni, darlıq vermə qəlbimə, məkan Sənindir.

ƏL-QUDDUS

Ya Quddus! Quddus Sənsən və qüdsiyyət Səndəndir, buna söz ola bilməz, Sən diləməsən Sən istəməsən heç bir şey pak sayılmaz, könlüm Sənə yönəlmədikcə saf olmaz. Qanımı hər nəfəsimdə təmizlədiyin kimi, nəfsimi də pak elə! Təmizlənənlərə məhəbbət bəslərsən, könlümü məhəbbətinlə təmizlə!

ƏS-SALAM

Ya Salam, Sənsən Salam, Səndəndir salam və salamatçılıq. Əmrini dinləyərək atəş, İbrahimə (Ə.S) sərin və salamat oldu. İbrahim (Ə.S) kimi dostluğuna qəbul et məni. İbrahim (Ə.S) kimi atəşi bir gül et dərimə. Salamını şəbnəm kimi toxundur

ƏL-MÖMIN

Ya Mömin!Sən hidayətini göndərməsən qəlblər necə rahat ola bilər?! Sən qəlbləri imanla rahat etməsən kim inandığından əmin olar?! Sən inandırmasan, kim mömin və imanlı qala bilər?! Nəfsimin hiyləsinƏ, nəfsimin əlinə buraxma məni. Elə bir mömin etki məni, peşmanlıqlarım Sənə döndərsin məni.

ALLAH

Sənsən Allah, Sənədir qulluğum, Səndədir çarəm, Səninlədir varlığım, Səni axtarar ruhum, Səni anar qəlbim, başqasına deyil, sənə möhtacam. Başqasını deyil, Səni çağıraram. Başqası yaradılmışdır, Sən Yaradansan. Başqaları davamsızdır, Sən daimsən və daim edənsən. Başqaları möhtacdır, Sən ehtiyacsızsan, ehtiyacları görənsən. Başqa İlah yoxdur, Sən Allahsan. Sən tayı-bərabəri və bənzəri olmayansan. Sənki bütün əksiksiz sifətlərin sahibisən, cəmalına çevir üzümü, başqasına rəğbət etdirmə qəlbimi.

ƏR-RƏHMAN

Ya Rəhman! Sən elə rəhmət edərsənki, rəhmətinin bir parçası mənə cənnət olar, rəhmətindən bir parıltı sonsuz xoşbəxtliyim olar. Rəhmətinin bir damlası başqa hər kəsin ruzisini yetirməyə kifayətdir. Bu çarəsiz qəlbimə mərhəmətini endir və bu fani ömrümü sonsuzluğa çatdır.

ƏR-RƏHİM

Ey Rəhim , Sən elə Rəhimsənki, qulaqlarım istər-istəməz Sənin sözlərini dinləməyə can atır, ağlıma vəhyinlə tənəzzül edirsən. Elə Rəhimsənki, Səndən istəyəndə həmişə verirsən, Səndən istəməyəndə də belə, bizə lütf edirsən. Elə Rəhimsənki, haqqı olana həmişə verərsən, haqqı olmayana belə çox bəxş edərsən. Elə Rəhimsənki, dünyanı bu qədər gözəl etmisən, Axirəti bundan daha gözəl etmisən. Ya Rəbbi, qorxudan qəlbimi əmin et mənim, hüzündən qəlbimi azad et. Atəşdən uzaq et məni, hicrana düşürtmə məni, rəhmətinin rəhminə al məni, mərhəmətinin qucağına al qəlbimi.