Koma vəziyyətində Los-Ancelesin “UCLA Medical Center” xəstəxanasına çatdırılan musiqiçini həkimlər xilas edə bilməyiblər.

Los-Ancelesin hüquq-mühafizə orqanları artıq M. Ceksonun vəfat etdiyini rəsmən təsdiqləyiblər. Televiziyanın birbaşa efirindən M. Ceksonun iyunun 25-də yerli vaxtla saat 14.26-da (Bakı vaxtı ilə iyunun 26-sı saat 02.26-APA) dünyasını dəyişdiyi bildirilib.

Kaliforniyanın qubernatoru Arnold Şvartsenegger xüsusi bəyanatında dünya musiqisinin simvollarından birinin vəfatından sarsıldığını və dərin kədər hissi keçirdiyini deyib.

M. Ceksonun ölüm xəbərini eşidən pərəstişkarları xəstəxanaya axın edirlər.

Artıq pop musiqinin kralının ölümünün ilkin səbəbləri də açıqlanıb. Xəbər agentliklərinin həkimlərə istinadən verdiyi məlumata görə, M. Cekson növbəti dəfə ağrıkəsici demerol preparatı qəbul etdikdən sonra halı pisləşib, nəfəsi dayanıb. Yanında olan şəxsi həkimi ona süni nəfəs verib və təcili yardım çağırıb. 8 dəqiqədən sonra gələn həkimlər lazımi tədbirlər görməyə başlayıblar. Həkimlər yol boyu onun ürəyini işə salmaq istəsələr də, buna nail ola bilməyiblər.

İlkin diaqnoz ürək dayanmasıdır.

Ceksonlar ailəsinin vəkili Brayan Oksmen (Brian Oxman) AFP-yə bildirib ki, M. Cekson iyulun ortalarında keçiriləcək London konsertində formada olmaq üçün müntəzəm olaraq güclü təsiri olan preparatlar qəbul edib. Vəkil müğənninin ölümünün gözlənilməz olmadığını da söyləyib.

Qeyd edək ki, pop-ulduz iyulun 13-dən başlayaraq Londonda 50-dək silsilə konsert verməyi planlaşdırdı. Konsertin biletləri internet vasitəsilə ani olaraq satılıb. M. Ceksojn son günlər Los-Ancelesdəki evində London konsertinin məşqlərini edib.

1958-ci ildə ABŞ-da anadan olan M. Cekson ilk dəfə səhnəyə 40 il əvvəl öz qardaşları ilə “The Jackson 5” kollektivi ilə çıxıb. 1972-ci ildə yazdığı "Ben" sinqlı Amerika hit-paradında birinci olub.

Onun ən uğurlu albomu isə 1982-ci ildə buraxdığı və indi də məşhur olan "Thriller" albomudur.

Ona qarşı irəli sürülmüş azyaşlılara qarşı əxlaqsız hərəkətlər etməsinə ilə bağlı ittiham üzrə məhkəmə prosesi 2005-ci ildə başa çatıb. Məhkəmə M. Ceksonun günahsız olduğunu üzə çıxarıb. Həmin vaxtdan M. Cekson insanlar arasında az-az görünürdü.


Apa.az saytından götürülmüşdür.