Orta məktəblərin buraxılış imtahanlarından keçə bilməyən xeyli şagird və onların valideynləri dünən Təhsil Nazirliyinin binası qarşısına toplaşmışdılar. Onların bir neçəsi qəzetimizə açıqlamasında imtahan sualları ilə rəsmi variantda verilən cavablar arasında uyğunsuzluq olduğunu söylədi. Bəzi� valideyinlər övladlarının attestat alması üçün onlardan rüşvət istənildiyini iddia etdilər. Bəzi uşaqlar isə� “qeyri-kafi” qiymət almalarının səbəbləri ilə razılaşmadıqlarını və imtahanda yüksək bilik nümayiş etdirdiklərini dedilər.
�Problemlə bağlı bütün suallara təhsil naziri Misir Mərdanov dünən keçirdiyi mətbuat konfransında aydınlıq gətirdi. Nazir əvvəlcə imtahan verənlərin sayı və nəticələr barədə bəzi statistik məlumatları açıqladı.

19 min 770 nəfər
attestat ala bilməyəcək
Nazir Misir Mərdanov bildirdi ki, imtahan verən şagirdlərdən 19 min 770 nəfəri buraxılış imtahanlarından kəsilib: “İyunun 3-dən 16-dək respublikanın orta ümümtəhsil məktəblərinin 11-ci sinif şagirdlərinin 8 fənn üzrə mərkəzləşdirilmiş qaydada keçirilən imtahanlarında 99 min 630 şagirddən 96 min 595 nəfəri iştirak edib.
Şimal bölgəsi üzrə 65 mərkəzdə 21 min 930 şagirddən 21 min 292-si iştirak edib ki, bunlarında 16 min 368 nəfəri müsbət qiymət alıb.
Qərb bölgəsi üzrə 69 mərkəzdə 22 min 168 şagirddən 21 min 386 şagird imtahan verib. 15 min 531 nəfər imtahandan müvəffəqiyyət qazanıb.
Cənub bölgəsindəki 72 mərkəzdə 23 min 771 şagirddən 23 min 299-u iştirak edib. Onlardan 16 min 108 nəfəri imtahanı uğurla verib”.
Misir Mərdanov onu qeyd etdi ki, ən mürəkkəb bölgə Bakı və Sumqayıt şəhərləri olub. Burada 87 mərkəzdə 28 min 355 şagirddən 28 min 168-i imtahana qatılıb. Şagirdlərin müvəffəqiyyət göstəricisi 91,84 faiz olub. Ölkə üzrə ən yüksək göstərici isə (94,31 faiz) Sumqayıtda qeydə alınıb.

Bakıda ən yaxşı göstərici Xətai rayonunda olub
Təhsil nazirinin sözlərinə görə Bakı şəhəri üzrə ən yüksək göstərici Xətai, ən aşağı göstərici isə Qaradağ rayonunda qeydə alınıb. İmtahanlarda 1 fəndən “iki” alanlar 5,56, 2 fəndən “iki” alanlar 1,43, 3 və ya daha artıq fəndən pis qiymət alanlar isə 1,16 faiz təşkil edib: “Respublika üzrə qeyri-kafi qiymət aldıqlarına görə, 5 min 67 şagird imtahana buraxılmayıb. Olimpiada qalibi olduğuna görə 6, xəstəliyinə görə isə 419 şagird buraxlış imtahanından azad edilib. Ümumilikdə isə imtahan verən şagirdlərdən 19 min 770 nəfəri buraxılış imtahanlarından kəsilib”.
Təhsil naziri attestata yazılacaq qiymətləri və onların blanklarını artıq məktəblərə göndərildiyini də dedi: “Qiymətlər yazılandan sonra blankların sürəti bizə göndəriləcək. Biz həmin blanklar vasitəsilə qiymətlərin attestata düz yazılıb-yazılmadığını müəyyən edəcəyik. “

”Qeyri-kafi” alanlara heç bir güzəşt nəzərdə tutulmur
Misir Mərdanov əlavə etdi ki, imtahanın nəticələrindən narazı qalanlar iyunun 22-dən 30-dək nazirliyin nəzdində yaradılmış Apellyasiya Komissiyasına ərizə verə bilərlər: “Əməkdaşlarımız hər bir şagirdi və valideyni qəbul edərək, kompyuterlərin qarşısında onlara niyə imtahandan qeyri-müvəffəq qiymət verildiyini izah edəcəklər. Bəzi valideyinlərin iddia etdiyi kimi, əgər hansısa şagird texniki anlaşılmazlıq ucbatından problemlə üzləşibsə, bu, tezliklə həll ediləcək”.
”Jurnalistlərin təkrar imtahan keçirilməsi nəzərdə tutulurmu?” sualına təhsil naziri birmənalı şəkildə “bu, mümkün deyil” cavabını verib. Nazir, hətta digər fənnlərdən “əla” alıb yalnız bir fəndən “qeyri-kafi” olanlara da güzəşt edilməyəcəyini söylədi.

”Beynəlxalq olimpiadada qızıl medal qazananlar ali məktəbə birbaşa
qəbul olunacaq”
Misir Mərdanov “Təhsil haqqında” qanun qəbul olunandan sonra ictimaiyyət arasında yaranmış bəzi anlaşılmazlıqlara da aydınlıq gətirdi. O, orta məktəbi qızıl medalla bitirənlərə ali məktəbə qəbulla bağlı heç bir güzəştin nəzərdə tutulmadığını söylədi: “Bəzi dairələrdə nümunəvi şagirdlərə qızıl medal verilməsi düzgün izah olunmur və bildirilir ki, guya həmin şagirdlər də ali məktəblərə qəbul zamanı imtiyaza malik olacaqlar. Əslində bu barədə qanunda heç nə yazılmayıb və bunlar yeni qanunu gözdən salmaq üçündür.”
Beynəlxalq olimpiadalarda müvəffəqiyyət qazanmış şəxslərin ali məktəblərə birbaşa daxil olması məsələsinə gəlincə, nazir: “Hazırda beynəlxalq olimpiadalar yalnız riyaziyyat, fizika, kimya, biologiya və informatika fənləri üzrə keçirilir. Hər il uzaqbaşı 3-4 nəfər olimpiadada qalib ola bilər. Əgər bizim şagirdimiz bu fənlər üzrə beynəlxalq olimpiadalarda yüksək nəticə göstərirsə, və ali məktəblərə qəbul olunursa, buna normal yanaşmaq lazımdır. Bu uşaqlar təbii ki, hüqüq, beynəlxalq hüquq fakültələrinə deyil, yalnız qalib gəldikləri fənnə uyğun fakültələrə daxil ola bilərlər”, - dedi.

“Kim attestat üçün valideynlərdən pul alıbsa, qanun qarşısında cavab verməlidir”
Təhsil naziri Goranboy Rayon Təhsil Şöbəsinin müdiri Elmar Əliyevin həbsinə də münasibət bildirdi. E. Əliyevin həbsi barədə məlumatı mətbuatdan aldığını deyən nazir qeyd etdi ki, Elmar Əliyevlə yanaşı, Goranboyda bir neçə məktəb direktoru da saxlanılıb. Hazırda isə məsələ Baş Prokurorluq yanında Korrupsiya ilə Mübarizə İdarəsi tərəfindən araşdırılır: “Orada buraxılış imtahanları, attestat verilməsi üçün valideynlərdən pul toplanması və təhsil şöbəsinin müdirinin seyfində boş attestatlar, şəhadətnamələr olub. Mən bir daha qeyd edirəm, əgər kimsə öz seyfində boş təhsil sənədi saxlayırsa, bu cinayətdir. Biz bunu birmənalı şəkildə bildirmişik və bildirəcəyik. Kim valideynlərdən pul alıbsa, attestat veriləcəyini vəd edibsə, o qanun qarşısında cavab verməlidir. Rəhbəri olduğum nazirlik belə hallara qarşı ciddi məsuliyyətlə yanaşır. Təhsil Nazirliyi təhsildə rüşvət halları ilə bağlı təkbaşına deyil, respublikanın hüquq-mühafizə orqanları ilə birgə mübarizə aparır”.

Zaman.az saytından götürülmüşdür.