“Qiyamət maşını” işə düşdü!
Bu saatlarda alimlər dünyanın sonunu tezləşdirə biləcək qeyri-adi eksperimentə başlayıblar
Bu saatlarda İsveçrə və Fransa arasındakı sərhəddə indiyə qədər mövcud olan ən böyük elementar hissəciklər tezləşdiricisi işə salınır. Lent.az-ın “Associated Press” agentliyinə istinadən verdiyi məlumata görə, “Böyük andron kollayderi” adlandırılan bu aparat dünyanın ən aparıcı fiziklərinin səyi ilə Avropa nüvə araşdırması mərkəzində yaradılıb. Fiziklər ümid edirlər ki, hazırlanmasına 8 milyard dollar və 14 il vaxt sərf olunan qurğu Kainatın yaranması barədə dəqiq informasiya almağa kömək edəcək. Güman edilir ki, indiki Kainatın yaranmasına səbəb olan “Böyük partlayış”dan sonrakı saniyənin trilyonda bir hissəsi ərzində yaranan şəraiti bu aparatın köməyi ilə bərpa etmək mümkün olacaq. Kollayder yerin yüz metr dərinliyində nəhəng tuneldə yerləşdirilib. Hissəciklər böyük sürətlə bir-birinə tərəf şütüyəcəklər. Hissəcikləri supergüclü maqnit mənbələr istiqamətləndirəcək. Alimlər də məhz hissəciklərin toqquşmasının nəticəsini araşdırmaq niyyətindədirlər. Android kollayderi ətrafında ciddi şayiələr yaranıb. Bəzilərinin fikrincə, qurğuda baş verən toqquşma nəticəsində kosmosdakı “qara dəliy”ə oxşayan boşluq yarana bilər. Bu boşluq həm qurğunun özünü, həm də Fransa və İsveçrə ərazisini uda bilər. Alimlər bu versiyanı inkar etmir, belə bir vəziyyətin yarana biləcəyini təsdiqləyirlər. Lakin onların fikrincə, hissəciklərin toqquşması nəticəsində yarana biləcək “qara dəlik”lərin ömrü çox qısa olacaq. Dubnadakı Birləşmiş nüvə tədqiqatları institutunun baş elmi katibi Nikolay Rusakoviç kollayderdə eksperimentlərin başlanmasının noyabr ayına nəzərdə tutulduğunu deyib. Onun sözlərinə görə, indi sınaq xarakterli eksperimentlər olacaq. Bu isə fizikləri o qədər də ciddi maraqlandırmır.
|